El Parque

El Parque de la Prehistoria de Teberga ye un proyectu orixinal y inéditu nel ámbitu européu. Trátase d’un equipamientu cultural que tien como oxetivu dar a conocer l’arte del Paleolíticu Superior n’Europa. Nél axuntóse una muestra importante d’eses manifestaciones artístiques con reproducciones facsimilares de conxuntos parietales y oxetos d’arte mobiliar bien significativos.

Nel Parque puen atopase trés edificios modernos, diseñaos pol arquiteutu Dani Freixes, integraos dafechu na redolada y en diálogu permanente col paisaxe. Trátase de zones bien estremaes: l’área d’acoyida de visitantes, la Galería y la Cueva de Cueves, siendo estos dos últimos espacios arquitectónicos distintos, pero con una temática común.

Dende abril de 2016 la corralada d´animales del Parque cuenta amás con una pareya de Uros de Heck o Neo-Uros. El uro, consideráu l´antepasáu selvaxe de toles vaques del mundu, desaniciose nel sieglu XVII y los exemplares que s´atopen en Teberga son una recreación que se desenvolvió n´Europa nos años 30.

El Parque ye, en definitiva, una muestra d’otra era, un sitiu pa conocer el pasáu y entender la evolución del home, amás de pa descubrir l’orixe del arte.

Comparte:       pdf Imprimir Enviar